عيب قوي علي رجالة داخليتنا (او علي راي صديقة تويتريه رجالة اللانجري ) انه مش عايز ينزل يامن شوارعنا ولا يامن عيالنا الا بمزاجه هو وعلي طريقته هو الخاصة ..
يوم الخميس خرج علينا المذيع المتالق يسري فودة في برنامج اخر كلام بفيديو بتاع الباشا اسمه ايه ... الفيديو بيتكلم عن استخدام سيارات الشرطة ومواردها اللي انا وانت بندفع ثمنها من ضرائبنا وبتستقطع من لحمنا الحي علشان تامين ولاد البشوات بتوع اللانجري اومراتاتهم .
الرسالة بتاعة يسري فودة كانت واضحة وصريحة .. عيب قوي يا داخلية اللي بتعمليه فينا . والحقيقة حتي هذه اللحظة واحنا بقينا الاثنين اهه لم اسمع اي رد او تصريح رسمي علي ما قدمه لنا يسري في برنامجه يوم الخميس
من يوم الثورة ما قامت وانا نفسي اشوف كلب شرطة واحد واقف في الشوارع .. كل اللي بشوفه عساكر مرور غلابة وفي حالهم وكأن مالهومش وجود من اساسه لاني مش لاقي حد عاملهم اعتبار وهما نفسهم مكبرين دماغهم من الشارع واللي فيه ومجرد واقفين زيهم زي عمود النور اللي واقفين تحتيه .
امبارح رسالة واضحة وصريحة من رجالة اللانجري في وجهة نظري انهم يعملوا اللي علي مزاجهم ووقت مايجيلهم مزاج ... كنت معدي جنب استاد الكلية الحربية في طريقي الي البيت وقبل ان اصل الي منطقة الاستاد اجد المنطقة ملغمة بسيارات الامن المركزي وقوات مكافحة الشغب ورجال الشرطة وسيارات دورية وعساكر في دائرة قطرها واحد كيلو تقريبا حول الاستاد ... في الاول لم استوعب انه ده علشان ماتش كورة وكل ما دار في اعتقادي لثواني وبالذات لما شوفت قوات مكافحة الشغب وتذكرت منظرها وشكلها يوم جمعة الغضب 28 يناير ... ان هناك عمل ارهابي حدث او في كارثة حصلت ... وبقيت قاعد في العربية اضرب في اخماس في اسداس ... لغاية ما قربت من الاستاد وصدمت بالحقيقة ان كل التجهيزات الخطيرة والمرعبة دي علشان تامين ماتش كورة ..
انا مش ضد الرياضة ولا ضد تامين الماتشات ... بس انا بتكلم علي قوة وسرعة التجهيزات ومدي تنظيمها لمجرد ان البشوات مزاجهم يامنوا ماتش كورة ... لكن حد يكلمني عن مزاجهم كده فيما يخص تامين الشوارع والبيوت والاحساس بوجود دورياتهم في كل مكان .. مفيش
الجمعة اللي فاتت ومع قرب الذكري السنوية الاولي للشهيد خالد سعيد يخرج علينا قسم الازبكية بضحية جديدة للعنف الغير مبالغ والغير مبرر ضد مواطن مصري بغض النظر عن هو مين او عمل ايه .. والغاء حقه في تحقيقات عادلة ومنصفه .. بل قام المامور الشملول بتخليص الموضوع بمعرفته .
من الاخر كده مازالت الداخلية ماشية علي سطر وبتسيب سطور لسه شكلها بتتعلم تفك الخط من اول وجديد
بتفكرني بمسرحية الهمجي للفنان محمد صبحي لما عمل عملية ورجع انسان بدائي همجي من الاول تاني ونسي قواعد المدنية والحرية
النهاردة كلنا لسه بنقول .... يا داخليه فينك فينك .. .. دم الشهداء بيني وبينك
وانا ضد اللانجري J
No comments:
Post a Comment