ماشي علي طريق السويس من يومين وواخد سرعتي القانونية وماشي في الحارة بتاعتي وزي الفل ... ولقيت فجأه واحد من علي شمالي جاي باقصي سرعة وطااااير ... وعايز ياخد غرزة من شمالي بيني وبين العربية اللي جنبي ... وفي نفس الوقت اضرب بعيني الاقي واحد علي يميني راجع بظهرة باقصي سرعة علشان فوت الفتحة بتاعة مطلع كوبري الدائري اللي عايز يطلع منها .
وكان عليا اني يا اما اروح يمين وارزع في اللي راجع بظهرة ... علشان افادي اللي جاي يجري علي الشمال ... او اني اروح شمال وترزع في ظهري من اللي جاااي طاااير ده علشان افادي اللي بيرجع من علي اليمين ...
قدامي جزء من الثانية افكر ولقيت نفسي بدون تفكير حسبتها اني في كلا الحالتين ميت طب احاول انقذ نفسي يمكن اقدر انفد واعيش .
طلعت باقصي سرعة بالعربية ومريت من جنب اللي راجع بظهره في نفس الوقت كان حصلني علي شمالي اللي جاي يجري باقصي سرعة ... وفي لحظة كنا احنا الثلاثة علي خط واحد لجزء من الثانية ...
اللي طاااير كمل طيرانه واختفي عن نظري قدااام .. واللي كان راجع بظهره لسه شايفة من المراية مكمل الهبل اللي هو فيه .. وانا لسه في طريقي وفي حارتي وابتديت اهدي سرعتي علشان اخد الوضع الطبيعي بتاعي تاني ..
الواقعة حقيقية علي فكره ومش من خيالي
بس فكرتني بعد كده وانا في الطريق ان ده حال الثورة ... وعربيتي المتواضعة هي الثورة ... واللي بيرجع بظهره بهبل دول بتوع اسفين علي اي حاجة ... اسفين يا ريس .. اسفين يا مجلس .. اسفين يا ولاد الوسخة ... اي اسفين وخلاص
واللي طاااير من علي شمالي دول المهابيش اللي عايزين يركبوا الثورة ويسرقوها ويطيروا بيها باقصي سرعة علشان محدش يلحق يحصلهم ويفرضوا امر واقع علينا .
فعلا .. الثورة ترجع الي الخلف .. وعلي المتضرر ان يبعد عن المسار
شعار لازم يتلغي بسرعة من قاموس الثورة والا حتبقي كارثة
No comments:
Post a Comment