عسكر عسكر يضرب ليه .. احنا بنسرق ولا ايه

عسكر عسكر يضرب ليه .. احنا بنسرق ولا ايه .

الجملة دي بتيجي في بالي في كل مرة اشوف مهزلة فض الاعتصامات اللي بيقولك عليها فئوية ... مش عارف ليه فئوية .. انا ضد اصلا استخدام الكلمة دي او المصطلح ده علي اي اعتصام .. هو لازم يكون الاعتصام بالملايين علشان ميبقاش فئوي .

وبعدين يعني هي الناس اللي نازلة تعتصم دي حد فهمها انها نازلة فسحة او رحلة او يعملوا شوبنج عند مجلس الوزراء او عند ماسبيرو او التحرير او اي مكان تاني في مصر .

دي ناس نازلة تطالب بحق ليها ...

سامعك اوعي تقولي مش وقته .. بتنرفز جدا من الجملة دي ... ما الناس بقالها 30 سنة بنقولها مش وقته .. والناس بقالها 30 سنة مش حاسة باي تغيير في حياتها .. بيتولدوا ويعيشوا ويموتوا وهما علي كلمة استني مش وقته

عملنا ثورة يا جدعان عملنا ثورة يا خلق هووووه ...

ولا حياه لمن تنادي بالنسبة للناس دي برده لسه بنقولها استنوا ومش وقته ... المفروض يعملوا ايه تاني ..

حط نفسك ياللي بتنكر عليهم حق الاعتصام ... جرب تعيش مكانهم يوم واحد وشوف احتياجاتهم وطلباتهم ومشاكلهم ... اتحداك انك تستحمل 24 ساعة .. مابالك بقة هما مستحملين 30 سنة يعني 262800 ساعة ياللي مستحملتش 24 ساعة

سامعك تااااني .. اوعي تقولي عجلة الانتاج والبلد لازم تتحرك علشان كلنا نعيش ...

لااااااااااااااااا ... انت كده اناني وبتفكر في نفسك بس ... انت عايز العجلة تتحرك والمصانع تنتج والمحلات تبيع ... علشان انت تعيش ..طب واللي واقف ورا الماكينة وبيدور العجلة ليك .. امتي هو بقي حيعيش . ازاي تقدر تقنعه ان تدويره للعجلة قبل الثورة مختلف لتدويرة للعجلة بعد الثورة ... ازاي تحسسه ان في تغيير للاحسن من غير شعارات او مانشيتات او اي كلام في كلام .. علشان هو شبع كلام خلاص ونفسه ياكل بجد .

بلاش نظرية البيضة قبل الفرخة والفرخة قبل البيضة اللي عايزين نعيش فيها ... اوعي تقولي البلد فاضية ومافيهاش فلوس ..

علي فكرة انا من يوم ما اتولدت في البلد دي دايما بسمع انها فاضية ومافيهاش فلوس .. وسبحان الله يا اخي برده عايشين وبناكل ونشرب وبنركب عربيات وبنصيف في مارينا كمان ...

ياراجل ده ايام المتعوس مبارك كان في مظاهرات واعتصامات ,, وكان هو بيتفشخر ويقولك اصل انا عندي ديموقراطية في البلد وسايب الناس براحتها ,, يبقي بعد الثورة اللي هو الناس اخدت حريتها يبقي مفيش .. هو انتوا فاهمين الحرية ازاي

من الاخر كده ... في اعتصامات ومظاهرات سميها فئوية .. سميها مهلبية ... فيه مظاهرات واعتصامات .. ولو العجلة تقف .. عنها ماشتغلت يا اخي ... وعلي راي المثل يانعيش عيشة فل يا نموت احنا الكل ...

يبقي يا حلو منك له ياللي معترض علي الفئوية والاعتصامات الحق حل وبطل اقتراحات ...