كل واحد عارف نفسه :))

بعد بكره ستكمل الثورة 8 شهور تقريبا منذ بدايتها في 25 يناير اللي فات ... وخلال ال 8 شهور لم اشعر باي تطور ايجابي علي الثورة

الثورة بدأت بمؤشرات عالية وحماسة قوية .. وصلت اقصاها في 28 يناير واستمرت في الصعود لغاية يوم تنحي مبارك .. بعد كده ابتدينا عملية فض المولد .. اتقسمت الناس اللي شاركت في الثورة ايا كان من بدايتها او من وسطها .. مش فارقة كثير دلوقتي .. اتقسموا الي 3 مجموعات ...

المجموعة الاولي ( ودول انا بعتبرهم قصار النظر ) انسحبوا من الميدان ومن كل حته وحصروا الثورة فقط في تنحي مبارك .. كأنه بازالة رمز الفساد سيزول الفساد كله بالتتابع في البلد

المجموعة الثانية ( وهم مجموعة كبيره لا انكر ) صدقت الكلام المعسول للمجلس العسكري عن حماية الثورة وعن قراراته باكمال مشوار ازالة الفساد وانتزاعة ومحاكمة المتسببين فيه ... من الاخر كده ريحوا انتوا يا جماعة شكر الله سعكيم احنا قدها وقدود

المجموعة الثالثة ( قليلة نوعا ما) صممت علي ضرورة استكمال الثورة واننا لن نحصل علي كافة حقوقنا وحرياتنا ومطالبنا الا اذا اكملنا ما بدأناه ..

والمجموعة الاخيرة دي بالذات اتهاجمت هجوم عنيف واتوجه ليها كل انواع الاتهامات .. شوية دول ناس فوضوية ... شوية دول ناس عملاء .. شوية دول ناس صييع وفاضيين مش لاقين لا شغل ولا مشغلة

وكل شوية يقولك العجلة والانتاج والبلد وخلي العجلة تدور وخلي العجلة تلف ... ولو حسبناها صح وبصينا حنلاقيها عمرها ما حتلف ولا حتدور .. اصل انت حتدور العجلة ازاي اذا كنت حاسس انك اضربت علي قفاك

بتوع المجموعة الثانية يقولك .. ياعم مانت بقالك 30 سنة بتنضرب علي قفاك جت يعني علي الشوية دول ... الله طب ما انا قفايا ورم .. بناقص بقة الشوية دول .. هو انا كنت ثورت ليه مش علشان مش عايز الشوية دول

الظريف بقة في الموضوع ان المجموعة الثانية لما لاقت بمرور الوقت ان اللي كانوا بينادوا بيه باستحمال ضرب القفا الشوية دول .. هما نفسهم بقوا مش قادرين وابتدوا يتذمروا علي المجلس .. وابتدوا يخطبوا ود المجموعة الثالثة علي استحياء ...

البلد النهاردة مليانة اعتصامات واضرابات عمالية في قطاعات كثير ... وغصبن عن عين التخين حتنجح ان شاء الله ... بس المهم دلوقتي نظرة المجلس العسكري للموضوع ايه ..

في اعتقادي الخاص ان المجلس حيقابل الموضوع بشدة ويمارس القمع زي النظام القديم سيتصاعد هذا القمع بتصاعد حدة الاضرابات ... لانه بالمنطق هو لا كان عايز يصلح ويعدل كان عدل من زمان ... وبلاش اسمع البوؤين الحمضانين بتوع ان المجلس مش بتاع سياسة وانه مزنوق زنقة الابل والكلام الفارغ ده ... اولا هو معاشر السلطة بقالة سنين كثيرة ثانيا هو اشترك بطريقة مباشرة او غير مباشرة في كثير من الامور السياسية ..

ثالثا وده بقة الاهم واللي يثبت انه فاهم وواعي هو بيعمل ايه ... انه بيشوف ايه اللي يضايق الناس .. وهو عارف ان الناس حتتضايق .. وان الناس حتبرطم وان الناس ممكن تشتم فيه ويعمله ... واكيد هو مش حابب يسمع شتميته او بيتلذذ والناس بتشتم فيه ...

يبقي اييييه ... J

يلا كل واحد يخمن الرد وهو ونيته بقة ... J

ملحوظة : انا مقصدتش اي فئات في تقسيمي للثلاث مجموعات ..

علشان مش عايز صداع والاقي حد بيقولي انت بترمي علي مين .. كله يحسس وكل واحد عارف نفسه J