اخطاء الماضي وتحديات الحاضر والتخطيط للمستقبل

منقولة من مدونة

help-egypt

علي 3 اجزاء مختلفة تم تجميعهم معا لسهولة المتابعة

**********************

اخطاء الماضي وتحديات الحاضر والتخطيط للمستقبل

انت مسيحي ارثوذوكسي زي كدة وبتحب البابا شنودة والكنيسة يبقي تقعد معايا شوية كدة عشان ليا معاك كام قعدة في الفترة اللي جاية بس لازم نبتدي النهاردةعشان الوضع من الاخر زبالة خالص والثانية بتفرق ولو سمعت فهمت ونفذت كلامي الدنيا هتزهزة وهتبقي اخر طعطعة

لو انت مسلم اين كان تصنيفك اخوان-سلفي مسلم معتدل مبتحبش التصنيفات احب انك تشرفني هنا وانا بكلم الشخص المسيحي الارثوذوكسي عشان لو بتحب مصر بجد مش كدة وكدة تساعدة انة يعمل اللي هقولة علية عشان كدة هستاذنك تاخد جنب شوية عشان هاخد المسيحي الارثوذوكي هحكي معاة شوية, انت دورك جاي بعدين بس الصبر حلو يا حلو انت

هفترض ان اسمك بيشوي او كرستين عندك من 25 -35 سنة من الطبقة المتوسطة

بص بقي يا بشوي-كرستين الوضع بقي زبالة خالص وادهور جامد في فترة قصيرة خلت كلنا مشلولين ومش حتي عارفين نتصرف بس عشان نتصرف لازم نعرف اية المشكلة الكبيرة , ببساطة وبدون لف ودوران عندنا في مصر فتنة طائفية هتهد الدنيا علينا كلنا و بس عشان نحاول نحل المشكلة المكلكعة دي لازم نفكر بمنطقية الاول ونحاول نلاقي بذكاء حلول تقلل حدة المشكلة وبسرعة,هنستخدم ابسط طرق حل المشكلة اننا نقسمها لاجزاء صغيرة ونحاول نحل كل مشكلة لوحديها واحدة واحدة و لو قدرنا نعمل كدة هنبص نلاقي بح مفيش مشكلة او لو موجودة مش هيبقي ليها تاثير الفظيع اللي احنا فية دة

1- تقسيم مشكلة الفتنة

اي فتنة طائفية لازم تبقي بين طرفين وفي حالتنا طرف مسيحي وطرف مسلم, طبعا يا بيشوي-كرستين مش محتاج احكيلكم علي كمية الحوادث من بداية الزاوية الحمرا لغاية امبابة وما بينهم من حكايات تحزن اكيد دة شئ معروف ومش محتاجين نرغي عنة كتير , شوية مسلمين يهيجو مرة وحدة لاي سبب يقومو يهدو يحرقو كنيسة ويموتلهم كام واحد في السكة.

انا شايفك يا محمود ابتديت تترفز ووشك يحمر وبتبرطم في الركن هناك , اصبر يابابا اصبر يا حبيبي مخلصتش كلامي سيبني اتكلم مع بيشوي – كرستين ولما اخلص معاهم جايلك

ايوا يا بيشوي-كرستين احنا طبعا حاسين بالاضطهاد والتميز والحال بيسوء كل يوم وانت مش عارف لية المسلمين بيعملو كدة ولية و طبعا هتقلي عشان هما وحشين وشريرين ومش عايزنا في مصر وعايزنا نهاجر

واحد لمون للاخ محمود هنا لو سمحت عشان اعصابة هتفلت وشكلة هيشتمني , بس بقولة اصبر يا حودة اصبر يا حبيبي

معلش ارجعلك يا بيشوي-كرستين واحب اقولك ان برضة احنا عندنا شوية مشاكل صغنونة كدة بس عارف اية.. المشاكل الصغنونة دي لاسف وان كنا كمسيحين مش حاسين او عارفين انها مشاكل فلاسف احب اصدمكم واعرفكم انها فعلا مشاكل ولازم عشان نحل جزء في المشكلة الطائفية لازم احنا نحل شوية المشاكل اللي عندنا , انا عارف انك ادايقت يا بيشوي – كريستين مني وتقولي هو احنا ناقصين هو مين اللي بيتهدلة الكنايس ولا بيتقتل الا احنا, هقولك اة بس خليك معايا مش هتخسر امشي ورايا وحط ثقتك فيها وزي موعدتك الكلام اللي هنقولة هنا هيريح وهيسرع جامد لحل المشكلة. مش كلام انشاء بس بجد عشان انا وانت نرتاح ونبطل خوف ورعب , مهو مش معقولة نشوف الوحش داخل علينا ومنمسكش مقشة نعمل بيها حاجة

اية بقي اول مشكلة عندنا يا بيشوي-كريستين

محمود: عندكو سلاح في الكنيسة

يا بني ادم قلتلك اتكتم واشرب اللمون بدل ما اطلعلك جرندايزر من جوة الكنيسة يروقك , اشرب واتكتم دلوقتي

معلش يا بشوي-كرستين متزعلوش من محمود هظبتهلكم بس مش دلوقتي دور جاي بعدين بس لما نخلص اللي في ادينا الاول

اي هي بقي اول مشكلة عندنا احنا كمسيحين

الانعزال

مع انتهاء السادات من حرب اكتوبر وخروجة منتصر اعلاميا تحالف السادات مع التيار الاسلامي لصد التيار اليساري واللذي كان يمثل لة حائط المقاومة ضد خططة لتحويل اقتصاد مصر للاقتصاد الحر الرأسمالي المعتمد علي الملكية الفردية,ونتيجة لصعود تيار اسلامي يحمل صبغة غير مصرية مشبوب بلمحة صحراوية واجه المسيحين في مصر شعور بالغربة خصوصا مع صعود الخطاب الديني الداعي لرفض الاخر وصدور الكثير من الفتاوي التي تعزز من هذا الشعور كتحريم معايدة غير المسلم في اعيادة والكثير من الفتاوي التي نحفظها ونسمعها حتي اليوم.

كردة فعل المسيحين وبتشجيع من الكنيسة انشأ الاقباط مجتمعا موازي يعيشون فية وتقلصت مساحة الاحتكاك بالمسلمين الي الحد الادني وهذة المساحة تزيد في الطبقتين العليا والسفلي وتقل جدا فيالطبقة الوسطي لاسباب سيتم مناقشتها لاحقا,

اليات الانعزال : انطوي المسيحين تحت جناح الكنيسة دينيا وهو طبيعي وعادي كون الكنيسة هي المكان التي تقام فيها طقوس الصلاة والعبادة , المشكلة ان المسيحين انطو ايضا مجتمعيا وهنا مكمن المشكلة التي نتحدث عنها اليوم , نظرا لظرف المجتمع في الفترة السابقة كما ذكرنا من صعود التيار الاسلامي وغياب وتقلص دور الدولة نتيجة للفساد والنهب والخ تحولت علاقة المسيحي- الكنيسة من مكان للعبادة الي مجتمع كامل موزاي يعيش فية الفرد المسيحي يحصل علي اغلب احتياجاتة المجتمعية بدون الخروج الي المجتمع الخارجي الا في اقل الظروف حيث يحصل الفرد المسيحي داخل الكنيسة علي خدمات واشياء في حالة المجتمع الطبيعي لايمكن ان يحصل عليها الا لو خرج خارج اسوار اكنيسة مثل

• نادي صيفي لابناءة يمارسون جميع الانشطة الرياضية والثقافية مثل كرة القدم – المسرح-فرق الغناء والكورال
• مستوصف علاجي يتبع الكنيسة
• مدرسة لابنائة
• معارض لبيع الملابس والمنتجات الغذائية
• دور نشر كتب دينية واجتماعية مسيحية
• قنوات فضائية مسيحية
• شركات انتاج سينمائي تقدم سير القديسين والمسلسلات الدينية
• جرائد كنسية
• تنظيم رحلات للاديرة وحتي المصايف وبل حتي الانعزال في المصايف ومصيف ابو تلات بالاسكندرية كمثال
• اجتماعات لتسهيل التعارف والارتباط والزواج -

محمود: اااة زي القسيس و بولين كدة بتاعت فيلم احمد السقا

ايوة يا خفيف زي بولين . ها.. هتطلع مخطوفة دي التانية وتجري تقول عايز اختي بولين؟؟

• اعلانات داخل الكنيسة عن اي شئ يخطر علي البال – وظائف – سيارات للبيع-ايجار شقق-كوافير حريمي

الي اخرة من النشاطات الاجتماعية العديدة والتي ادت الي ما يلي

انتاج شخصية معتمدة علي الكنيسة بشكل كامل اجتماعيا ويشعر بالغربة خارج اسوارها للاختلاف الشديد بين النموذجين ادي ايضا لصعود الكنيسة كقوي سياسية تمثلت في حزب سياسي للمسيحين وانحسار دور الفرد المسيحي في القوي السياسية الطبيعية الا نادرا

ملحوظة سيتم افراد مقال اخر بمفردة للتحدث عن دور الكنيسة السياسي وتعقيداتة

هذا الانعزال ساهم وبشكل غير مباشر في الفتنة الطائفية نتيجة لغياب الفرد المسيحي عن مجتمعة استغلتة الايادي الخبيثة لتمرير بعض الاساطير عن المسيحين واستغلال جهل المسلمين بطبيعة مجتمع المسيحين من الدخل ادي الي اشمئزاز المسلم من المسيحي عموما لانة

1. رائحتة كريهة لانة لا يتوضا ولا يتبرأ من البول
2. ديوث لا يغار علي نسائة لانة ياكل لحم الخنزير
3. طعم الاكل المسيحي غريب
4. يريدون ان يطردو المسلمين من مصر لانهم يعتبروننا غازين محتلين

الي اخرة من الخرافات والتي اتمني ذكرها من الاخوة المسلمين في التعليقات حتي اضيفها هنا

شوفت بقي يا بيشوي-كريستين اننا لما متعاملناش مع المسلمين فضل يطلع علينا اشاعات زي الزفت ازاي لدرجة انهم مصدقينها كتيير ولو عملنا اية مش هنقدر نثبت العكس لانها بقيت من المسلمات واحنا متعاملناش معاة عشان يقدر يغير وجه نظرة اللي هو اتربي عليها وسمعها علينا من اصحابة وجيرانة

طب اية الحل

الحل زي ما قال فتحي لرشدي بية في فيلم طيور الظلام.. بوسه . ايوة اجري امسك المسلم واتشعبط فية وبوسه , كلمة اعرفة صاحبة اعزمة في بيتك كلمة في كليتيك بلاش تقعد في حتة المسيحين بس في الكلية روح اقعد معاة في حتتة , شارك في الاحزاب اللي بقيت زي الرز دلوقتي اختار اي حزب . حتي لو حزب الاخوان روح وريهم نفسك وخليك زي ما بيقولك الكتاب نور وملح العالم , مش عشان مصر والوطنية والكلام دة لا عشان نفسك الاول ومصلحتك وعشان ولادك من بعدك , لانك لو فضلت خايف ومرعوب مش هنحل مشكلة هي كدة موتة وكدة موتة طب قوم بقي حاول شوية اكيد هتصيب يعني وعشان اقولك انا واحد عاشر جنسيات كتيرة جوة وبرا مصر وبدون كدب ولا رياء عمرك مهتلاقي احن واجدع من المصري لو عرفت تملك قلبة,فاكر لما نزلت معاة التحرير وحطيتو مع بعض علي مبارك بالجامد قوي وحاوطة وهو بيصلي الجمعة شوفت الواد ابو دقن عاملك حلو ازاي وكان بيحضنك وبيبوسك ولا كانة صاحبك من زمان وكنت واحشة وكانك جاي من غيبة , بس طول مهو مش عارف وواخد عنك فكرة وحشة متطلبش منة بقي ان ميدايقكش او يرخم عليك او اول ما يحس انك بتهينة وبتتعالي علية انة يولع فيك عشان هو متغاظ منك لانك مش معبرة وعايش الدور علية

فهمت يا بشوي-كريستين يلا بقا قومو اعملو دة وانت ياض يا محمود هبقي انادي عليك تسمع الكلام اللي بنقولة المرة الجاية

بكرة فية مليونية عشان الوحدة الوطنية والقضية الفلسطينية في التحرير هتبتدي بصلاة الفجر وكمان قداس بدري جدا . دي فرصتك تقفش في المسلمين وتبوس وترجع ايام الثورة الحلوة في التحرير

يتبع

**********************

انتشر تسرب وتوغل

لي يا بيشوي – كرستين اتفضلو , اية دة محمود جة برضو طب تمام اشطة جدا اية عجبك الكلام اللي قلتة المرة اللي فاتت لبيشوي-كرستين . طيب يلا اركن بقي علي جنب برضو عشان لسة فية كلام كتيير هقولة لبيشوي-كرستين عشان لسة السكة طويلة معاهم وورانا حاجات كتيرة هنعملها مع بعض.قولي بقي يا بيشوي-كرستين اية رايك لما بوست محمود زي ما قولتلك المرة اللي فاتت وقولتلك روح معاة التحرير , اية رايك بقي بعد ما رجعت من هناك , شوفت مصر بقي لسة برضو خايفة عليك ازاي , متبصيليش كدة يا بيشوي-كرستين دة مش كلام وبس لا بجد دة حقيقة طبيعية صدقني هي دي مصر امنا ممكن حد فيها يدايقك ويرخم عليك بس هي هتقولة اوقف . لا مش كدة , بس هي مش هتعمل كدة غير لما تروح تشكيلها ,ومش هتقدر هي تساعدك غير لما انت تساعد نفسك لاني زي ما قولتلك المرة اللي فاتت ونصحتك بلاش تنعزل عن مجتمعك -مصر وانك لازم تنزل في الازمات تبوس محمود عشان هو كمان محتاج يشوفك ويعرف عنك الكتير ويغير اللي هو عارفة عنك بطريقة سلبية .شوفت لما الميدان كان بيقول الهلال ويالصليب, هنهد تل ابيب, شوفت ولاد مصر اذكيا ازاي وانهم حاسين ان اسرائيل ورا الفتنة ازاي وبيبعتلوها رسالة مباشر انا احنا مش هنبقي سمن علي عسل . لا بيقولوها اتلمي يابنت ال…….يا اما هنهدك

مش مصدقني طيب خد بص علي افرايم ابن ابونا لما عايش طبيعي وسط اخواتة السلفين كان حاسس باية

محمود: اية اية. افرايم وابن قسيس ومصاحب سلفين كمان..دة اكيد جاسوس للكنيسة

انا عاذرك يا حودة انت من الفجر لصلاة الجمعة في التحرير واكيد الشمس طبخت مخك . خد اشرب شوية ماية ساقعة ونعنش كدة عقبال ما يجي بيشوي-كرستين من عند الجاسوس افرايم

رجعتو .. طب تمام نكمل مع بعض بقي, المرحلة اللي جاية يا بيشوي-كرستين محتاجة مننا زي ما بينتلك المرة اللي فاتت شوية معالجة للمشاكل اللي عندنا واللي احنا مش حاسين انها مشاكل ومش شايفينها , بس بقي خلاص مبداهاش بقي ملهاش حل تاني صدقني لازم نكمل في السكة دي وزي ما قولتلك مش عشان الوطنية ومصر وهوبا هوبا اية هنغلبهم والكلام دة لا عشان خاطرك انت

بص يا بيشوي-كرستين هنعمل اللي علينا علي مرحلتين

1- مرحلة سريعة دلوقتي وحاليا وهتبقي حاجات بسيطة بس تاثيرها سريع وكويس زي نزولة التحرير كدة ,

الخطوة التانية في المرحلة السريعة هقولك عليها بعدين في اخر كلامي النهاردة عشان تمشي من هنا وانت فاكرها كويس2-

مرحلة بطيئة وتحتاج مننا فترة طويلة شوية بس تاثيرها هيبقي جامد طحن وتشوف ازاي دلوقتي

عكس عملية الانعزال ببدء عملية الانتشار

الفترة اللي جاية دي لازم ننتشر في كل حتة . ايوة زي ما الليمبي قفش الراجل اللي جاي يعزي في ابو عم باخ والصوان فاضي قالة عايزك تنتشر وتقعد علي كل الكراسي , ايوة هي دي وهقولك تنتشر فين وازايبحسب حالتك الاجتماعية ومكانك انتشر واتعرف علي جيرانك . زمايلك في الدراسة ,في الشغل في الاعلام في كل حتة تقدر تتعرف وتتشاف فيها حركة الانتشار دي مفيدة جدا سياسيا لية بقي عشان دي طريقة ضغط ناعمة بطريق غير مباشر علي محاولات الايادي الخبيثة في انها تنشر عنك اشاعات وبتستغل جهل محمود عنك لانة فعليا مكنش شايفك ولا يعرف عنك حاجة الفترة اللي فاتتعار عارف اية اللي بيدور في دماغك دلوقتي انك لما بتخرج للمجتمع بتلاقي احيانا تميز وبشكل واضح وبتقولي انا مضطهد, اسمحلي اقولك انت بتتكلم صح وعشان تواجة المشكلة دي عايزك تقاوم التمييز دة , لانك يا بيشوي-كرستين للاسف سلبي شوية في مواجهة التميز دة. متزعلش مني معلش لو انت بتضطهد بنسبة مية في المية,تمانين في المية هيختفي لو وقفت وقلت لا , انا مش عاجبني التميز دة, انا عارف ان دة كلام عجيب بس صدقني انا عملتة وجربتة وتخيل انة نفع, انت دكتور في سنة خامسة والدكتور في امتحان الشفوي بيرخم عليك عشان مسيحي , ومالة سيبة يرخم بس مش بعد ما تجاوب كويس تسيبة يتلكلك علي غلطة ويديك الصفر المتين , متسكتش اعمل اي حاجة اصرخ , صوت, كلمة قولة لية بس كدة يا دكتور , عيط قدامة وحنن قلبة ولو منفعش ارمي بلاك علية ابطح نفسك ولبسة مصيبة واطلع من عندة غرقان دم واعملة هوليلة ومصيبة, بتضحك لا متضحكش يابيشوي-كرستين لازم تحارب عشان تنتشر, دي مسالة حياة او موت مفهاش هزار , متحسسش ان اللي بيضهدك انة سهل انة يضهدك لا مش هتقدر تغير اللي جواة من ناحيتك بس هتصعب علية الموضوع لدرجة انة ممكن يبطل يعمل كدة عشان ميوجعش دماغة بالزيطة اللي هتعملهالة لو فكر يدايقك, صدقني حركة بسيطة بس هتغير كتير , اة انا معاك مش هنقدر نغير نفوس بس صعب الموضوع علية, نفس الفكرة لو مديرك في الشغل او اي مكان تاني, هديك الدليل من عندي لاني حصلتلي الحكاية دي وانا في الكلية , في مادة كان بيديها معيد عايش الدور خالص عشان ابوة دكتور في نفس القسم وكمان كان متعصب وحطني انا وزميلي المسيحي التاني في السكشن في دماغة من اول يوم, وفي يوم كدة اتلككلي انا وزميلي عشان بفي وسط ما هو بيشرح علي السبورة للمرة التانية لقيني انا وزميلي قاعدين علي الكراسي في المعمل عشان ابن الهبلة كان معودنا اننا نقف اثناء ما هوا بيشرح وانا وزميلي كنا خلاص خلصنا التجربة وهو جة وصححلنا بس باقي السكشن طلع نتايج غلط فكان مضطر انة يعيد الشرح تاني فانا قعدت وزميلي قعد علي الكرسي قام بص كدة مرة واحدة وقالنا انتو قاعدين . يلا اتفضلو برة السكشن, انا وقفت قولتلة انا عملت اية غلط عشان اتطردني, انا خلصت تجربتي وانت صححتها في ورقتي وخلاص, قالي مزاجي كدة , بصيت لزمايلي في السكشن وقتلهم اشهدو علي بيحصل واخدت زميلي قلتلة تعالي معايا , المهم روحنا لرئيس القسم ودخلت مكتبة وانا بصرخ وعامل فيها منهار وانا من جوا هموت من الضحك . حراام يا ناس , حرام يا عالم لية بس كدة يرضيك يا دكتور اللي بيحصل دة فيا , لية هو انا عملت اية, طبعا رئيس القسم اتخض وارتبك وقالي اية حصل اية روحت حاكيلة الحكاية وقولتلةلازم تيجي دلوقتي معايا عشان زماليلي في السكشن هيشهدو, طبعا انا بتكلم بثقة عشان انا مقضيها بوس مع زمايلي المسلمين وعارف وواثق انهم هيقفو معايا , المهم رئيس القسم مش عايز مشاكل لابن زميلة المعيد وكمان عايز يريح نفسة مني قام اخدني انا وصاحبي وفتح باب المعمل , المعيد شاف رئيس القسم وانا وصاحبي وراة وشة جاب الوان الطيف وانا بقي مش ساكت بقولة اسال الطلبة يا دكتور انا اطردت لية فراح تجاهلني وبص للمعيد قالة معلش عشان خاطري دخلهم تاني, طبعا المعيد المصدوم مقدرش في اللحظة دي يقول اي حاجة لانة متوقعش اني هعمل كدة , قالي اتفضل مكانك , ومن ساعتها يا بيشوي-كرستين المعيد دة مهما اعمل في سشكنة مبيجيش جنبي خالص بالعكس احنا اتصاحبنا واداني درجة كويسة في الامتحان العملي في اخر السنة,

التميز اثناء الانتشار

وانت بتتنشر وبتخرج من عزلتك يا بيشوي-كرستين لازم تتميز وتبقي جامد جدا في اي حاجة بتعملها, دة هيفيدك علي المستوي الشخصي جدا , وكمان هيخلي محمود يتقبلك اكتر وكمان يحتاجك, دة هيصعيب الحكاية علي اللي بيوز اخوك حودة عليك , لان حودة في الحالة دي هيطنش الكلام اللي بيسخنة عليك لان عندة مصلحة وحابك ومحتاجك كمان

محمود: ياولاد الاية اية شغل اليهود دة

هههههههههههههههههههههه علي فكرة تارييخا ودينيا يا حودة اليهود ولاد عمكم بالدم , اسكت بقي واسمع الباقي

بص يا بيشوي علي الامثلة

د\مجدي يعقوب: صنايعي قلوب معتبر. برنس ,يمسك القلب العليل يروقوة والمريض يطلع من اودة العملية يجري زي الرهوان

جورج اسحاق: ياما اضرب واتسحل واتبهدل يعيني بس راجل وطني وسياسي محبوب من الكل

مهندس لواء\ باقي زكي يوسف: بالبلدي نقدر نقول علية الشخص اللي حط خطة فض بكارة اسرائيل في حرب اكتوبر , هو اللي اقترح فكرة رش خط بارليف بالمية عشان نفتحة

هاني رمزي في اتنين : الاول مدافع منتخب مصر ايام مكنا بنعرف نروح كاس العالم ومدرب المنتخب الاوليمبي والتاني الممثل اللي بيمتعنا كلنا او احيانا بيـ… مش قوي يعني بس برضو شغال

نجيب ساويرس :رجل اعم

محمود : اعوووذ بالله

شوفت بقي يا بيشوي-كرستين مع ان نجيب مستفز وبيغيظهم بس محدش بيقدر علية عشان هو رجل اعمال جامد وتقيل وشايل جزء كبير من اقتصاد مصر ولما الجزائر رخمت علية في شركتة اللي هناك بعد عركة الجزائر حتي محمود كان صعبان علية نجيب وكان بيساندة

احنا كلنا بقي لازم نبقي زي الامثلة دي في اي حتة نكون فيها ودة هياثر بطريقة حلوة حتي في الخطاب الديني بتاع محمود .. اقولك ازاي .رجال الدين اللي مش عاجبنا كلامهم اليومين دول واللي بيقولو فتاوي بتدايقك زي ان حودة ميعيدش عليك واللي فعلا اثرت علي محمود وخلتنا كلنا نزعل لما لقينا الواد الجدع وائل غنيم في جروب كلنا خالد سعيد بيهنينا في عيدنا وقامت اصوات كتيرة تقول حرام ولا يجوز رجال الدين دول انا بسميهم تجار الدين

متبصليش ووشك احمر يا محمود تسمية تجار الدين هتفهمها دلوقتي وكل الاحترام لشيوخك الاجلاء

معلش يابيشوي-كرستين لازم الحق نفسي محمود سريع الغضب وانا ياعم مش عايز اضرب يابا

نرجع لموضوعنا بالنسبة لتجار الدين , التسمية مش جاية من ان الشيخ بيكسب فلوس بالدين . لا مش قصدي كدة انا بمثل الدين كسلعة الشيخ بيحاول ينشرها ويبيعها لكل الناس هنا بقي الييات الاقتصاد والسوق تظهر في العملية دي وبما ان الدين اي دين عبارة عن نصوص وشرحها وتفسيرها هي اللي بيديها المعني في الحالة دي راجل الدين بيشوف المستهلك عايز اية ويدهولة. زي ما بيستخدم النصوص الشرعية في انة يطلع انة حرام ان يعيد عليك برضة نفس النصوص دي يقدر هو يخلي ان مفيش اشكال خالص ان حودة يعيد عليك. لما الشيخ هيلاقي حودة بيعيد وعايز يعيد عليك مش هقول لا دة حرام هيشجعة ان يعمل كدة, اثبتهالك فاكر قبل ما نطلع في الثورة كل الشيوخ قالو لا وحرام , لما لقيو كلامهم مش ماشي رجعو اتعتذروا ورضيو باللي عايزة حودة وبيشوي-كرستين

محمود: ابدا انا مش ممكن اسمح بدة دي دولة اسلامية وكمان ….

بص يا محمود الكلام دة ليك . عارف الدهب , طبعا عارفة واكيد زي زيك مش عارف تجيب شبكة عدلة عشان ام الجرام ب 250 دلوقتي والعملية ضنك خالص , الدهب دة يا حودة لما بيبقي دهب خالص بيبقي طري جدا وزي العجينة ومينفعش تعمل منة سلاسل وغوايش ولا اي حاجة . عارف اية اللي بيقسية ويخلية جامد . بيتحطلة شوية نحاس صغيرين قوي وتطلع سبيكة دهب براقة وحلوة وفي نفس الوقت جامد. مصر بقي يا حودة سبيكة الدهب , انت الدهب الصافي وبيشوي-كرستين هما النحاس القليل مع بعض تبقي مصر سبيكة دهب جامدة من غيرهم سبيكة الدهب تبقي طرية جدا واي حد يقدر يقطع منها بسهولة لكن مع بعض تمسك سبيكة الدهب دي تظرفها علي دماغ اي حد تشقها نصين, عارف عشان ترجع تفصل الدهب عن النحاس لازم يحصل لية . لازم تولع في السبيكة بنار عالية قوي يسيح الدهب والنحاس ينفصل ويطفو علي وشة. عشان كدة ولاد ال.. ولعو في مصر عشان يفصلونا عن بعض

محمود:ممممممممممممممممم طيب يا سيدي

بص بقي للكلام اللي هنعملة الاسبوع دة يا بشوي-كرستين عشان نقلل و نطفي نار الفتنة شوية1

- بلاش ندخل اي موقع مسيحي اليومين دول . صدقني هتحس بفرق رهيب من حيث المشاعر السلبية اللي المواقع دي بتعملها فيك . انا لما بدخلها ببقي عايز اولع في نفسي وفي بلدي من الكلام المكتوب وانا عارف انة دة مش صحيح. ارجوك اسبوع واحد بس وانت تدعيلي الكلام ينطبق علي قنوات زي الطريق

2- بلاش تشتبك مع حودة في تعليقات المواقع الاخبارية زي الشروق ومصراوي والدستور والفيسبوك وشباب التويطرز علي راي الشيخ شومان , لما تدخل وانت حاطت صورة البابا شنودة وتعلق في الدستور علي خبر للاخوان مثلا وتقول الاخوان المنافقين. دة مش كويس ولما تلاقي حودة بيشتم البابا شنودة متشتمهوش وتشتم الاسلام . اة حودة احيانا بيزودها وبيكتب كلام يحرق الدم بس معلش اليومين دول مصر اهم من البابا شنودة اللي بنحبة, بص لو خيرتني بين البابا ومصر هقولك اموت انا والبابا وتعيش مصر . معلش متردش علي حودة دورة جي بعدين وهيبطل يشتم صدقني هو بس بيزيط في الزيطة في نفس الوقت لما بقولك متشتبكش مع حودة علي النت مش انك متتكلمش او تعلق لا لازم تظهر امال ايد امي اتهرت في الكتابة من بدري علي الانتشار لية . بس ببساطة خليك ايجابي ارجوك اسمع كلامي في النقطتين دول وخد حودة وروحو دلوقتي وهبقا انادي عليكم لما ابقي عايز اكلمكم تاني

**********************

المندفع , المستعرض والمتفرج

اهلا اهلا يا محمود اتفضل اقعد جنبي النهاردة وبيشوي-كرستين هما اللي هيقعدو في الركن يسمعو هقولك اية عشان كلامي معاك النهارة كتير ومتشعب وبرضو صريح ومن القلب.

شوف يا محمود انا عارف اني هقابل مشكلة في كلامي معاك لانك بشخصيات مختلفة لذلك هوجة كلامي بنقط محددة لكل شخصيةلو انت جاي اول مرة هنا اتمني تراجع كلامي لبيشوي-كرستين عشان تعرف انا دعيتك النهاردة نتكلم لية

الرسالة الاولي

الرسالة التانية

بص عليهم بصة وارجعي تاني

تمام يلا نبتدي مع بعض

كلامي النهاردة هيبقي مع محمود السلفي والاخواني ومحمود اللي لا ينتمي للفصيلين دول وبيصنف نفسة مسلم عادي ويلا نبتدي مع اكتر واحد شادد وعامل خناقات مع بيشوي-كرستين

محمود السلفي:

زي ما قال محمد محي اعاتبك علي اية ولا اية يا حودة , اية مبتسمعش اغاني طيب يا سيدي انا عارف بس كنت برطب كلامي معاك في الاول بس شكلك قافش , مش مهم ندخل في الجد بقي يا برنس

انا عارف يا محمود انك بتشكي ان الاعلام بيظلمك ومصورك وحش كاسر فلت من القمقم بعد الثورة وناوي يطيح في الكل , معلش يا حودة انا عارف انك اتظلمت كتير في سبيل الدعوة وكتير مننا حتي اخواتك المسلمين ميعرفوش انك اتفرمت واتشويت بالمعني الحرفي في زنازين امن الدولة, بس يا محمود عايز افكرك بولاد مصر اللي جريو فتحو صدرهم للرصاص واقتحمو امن الدولة وخرجوك منها , انا مش محتاج منك اكتر انك تفتكر الحتة دي دلوقتي . اعتقد اني مش بطالب منك كتيير , مش هدايقك واقولك انت كنت قاعد في بيتك ومنزلتش الثورة عشان قابلتك وشوفتك في ميدان التحرير وانت بتصرخ باعلي صوتك مسلم ومسيحي ايد واحدة , وانت قاعد بتحدف طوب وبتواجة البلطجية جنب اخواتك , وانتا بتعترف انك اول مرة تتكلم مع متبرجات ومسيحين وبتغير فكرتك عنهم, اية يا حودة اللي حصلك يا سيدي بعد ميدان التحرير, لية تسيب نفسك للي بيستغل حماسك للدعوة في انة يولع البلدعندك مشاكل مع الكنيسة والمسيحين ومش طايقهم دة مفهوم والاسباب كتيرة يا سيدي و بس كان من الممكن انك توصل اللي انت عايزة من غير ما تتظاهر قدام الكاتدرائية وترعب بيشوي-كرستين , عارف يا حودة الكنيسة بتمثل لمسيحين مصر اية . هي الدين نفسة , مش زي الاسلام ولازم تفهم كدة يعني انت نفسك بتهاجم الازهر وبعت اخواتك المنقبات يتظاهرو قدامة عشان مسالة النقاب ومحستش انك عملت حاجة , لا يا حودة الكنيسة عند مسيحين مصر هي الدين واي مساس بيها مساس بالدين نفسة وساعتها الموت هيبقي سهل قوي , لية يا حودة توصل البلد لكدة يبني وانت عارف ان مصر مهمة قوي في مشروعك لنهضة الامة الاسلامية, اية مستغرب اني عارف انت عايز اية, لا اصبر بس انا عارف حاجات كتير وهيبان دلوقتي.

بص يبن الحلال الي احنا فية دة بسبب الماضي بكل ما فية من عداء وكراهية ما بينا احنا الاتنين بس بقي اية خلاص احنا اتورطنا في بعض يا سيدي ووشنا في وش بعض طول اليوم دلوقتي , الاول بيشوي-كرستين انعزلو زي ما وضحت قبل كدة وانت ليك اكتر من 8 سنين معزول برضو وشايفك وعارفك بتقول اية في مواقعك الي حافظها صم وشايفك بتبني فيها سنة سنة كراهيتك ليا يا سيدي , مرة بشوية حقايق ومرة بالكذب, شايفك بتتعلم انك تشتمني وتقول عليا خنزير نجس , وانت بتقتنع اني مخبي اسلحة في الكنايس عشان اهاجمك , وانا برمم وابني الاديرة وانت بتستعجب لية بنعملها كبيرة وواسعة كدة , او بالمرة يا حودة الصورة بتاعت الطيارات في قاعدة العديد بتاعت قطر مش صورة حقيقية دي صورة في امريكا لماكن بيرمي في الجيش الامريكي طياراتة القديمة وبيركنا بالشكل المنظم دة عشان متاخدش مساحة مش اكتر, نرجع لموضوعنا بقي يا سيدي, انا زعلان منك يا محمود عشان انت متسرع واهوج وبتخسر كتيير باللي انت بتعملة , استغلوك في امبابة وفرحان قوي انك حررت عبير وحرقت كنيسة , طيب يا سيدي اهو 60 كنيسة مغلقة اصدرت الحكومة تعليماتها بفتحهم تاني , شوفت بقي انت خسرت ازاي يعني رايح تحرق كنيسة رجعتلي فاتحلي 60 وحدة. يا حلاوة يا برنس , عشان كدة انا بكلمك يا حودة لمصلحتك, تخيل بقي انا المسيحي عايز مصلحتك لانها مصلحتي ومصلحة بلدي كمان و شوف العجايب يا اخي, بص يا حودة الفترة اللي جاية انت وبيشوي-كرستين لازم تتعلمو انك تلعبو حاجة اسمها سياسة , انتو الاتنين جداد جدا في الموضوع دة ومرتبكين ومش عارفين تعملو اية بس تهورك وحماسك بهدل الدنيا خالص, بلاش خناقات وضرب وتكسير , لاعبو بعض علي الشناكل بالسياسة , اتعلم يا حودة من الاخوان , مبقولكش امشي بمنهجهم دة شئ ميخصنيش بس اتعلم منهم الحنية عشان كل حاجة بالحنية بتفك , شتم البابا شنودة وتقولة شنودة هربز النجس ملهوش لازمة خالص ولا هينفعك اساسا وبلاش تتغر وتتسرع عشان احساسك انك خلاص قربت تحكم مصر وهتحقق حلمك بالحكم بالشريعة مخليك مزقطط خالص ونافش ريشك , بس كل دة صدقني بيهدم حلمك دة من غير ما تحسفي الاخر يا محمود معنديش ليك حاجة تعملها زي ما بنصح بيشوي -كرستين واقولهم بيعملو اية بالظبط انا سايبك لضميرك ولحكم مصر عليك, عايز تتابعني وانا بكلم محمود الاخواني عشان فية كلام ليكم انتو الاتنين

محمود الاخواني :

حبيبي وابن حبيبي , اللعب والصراع معاك سهل وبسيط عشان انت بتلعب سياسية عشان توصل لهدفك , احيانا بتتهور بس حتي تهورك بيبقي خفيف الدم واللعب معاك فية خباثة وهي دي السياسة . ملياش عتاب ليك زي اخوك محمود السلفي بس فية نقطة عايز اتكلم معاك فيها يا سيدي

اولا حلمك اللي ليك 80 سنة بتحاول تحققة في انك تحكم مصر بالشريعة الاسلامية كحجر اساس انك ترجع دولة الخلافة الاسلامية , اوكي يا سيدي حقك انك تحلم بدة , بس لازم تعرف اني مش عايز دة عشان انت هتظلمني وكمان انا مشوفتش نموذج لدولة بتقول انها اسلامية وبتطبق الشريعة وكان نموذج يخليني ما اقلقش منة , عموما كمل انت في سكتك ونتقابل في صناديق الانتخاب واللي فية الخير لمصر يعمله ربنا……. اة قبل مانسي . بلاش تستغل محمود السلفي سيبة في حالة هو مش ناقص مش عشان تبان انك

وسطي و تورط الغلبان في احداث ليها مردود اعلامي سئ عشان تطلع انت كويس , ايوة يا سيدي متبتسمش انا واخد بالي

محمود المسلم العادي :

الامور في ايديكم انت كلها عشان انتو الاغلبية وانتي اللي هتحددو مين هيعمل اية ارجوكو سيبو الكنبة والتليفيزيون وانزلو شاركو اخواتكم في صنع مستقبل مصر. احب بس في الاخر افكركم ان مصر محتاجانا نشتغل ونتعب الفترة اللي جاية عشان نمحي اثر 30 سنة قرف وبهدلة

طلب اخير من الكل لو سمحتو انشرو الكلام دة لكل اصحابكم لو حسيتو انة هيفيد مصر . يا حودة لو ليك اصحاب مسيحين شير ليهم علي الفيسبوك والتويتر الرسالتين الاولي والتانية ولاخواتك المسلمين الرسالة التالتة

عنوان المصدر

http://help-egypt.com/cplus/?m=201105