ليه حانرجع نعتصم تاني في التحرير

من مدونة مالك : http://malek-x.net/drupal/node/695

يوم 25يناير, كانت مطالبنا بسيطه

عيش, حرية, كرامة انسانيه

او

عيش,حريه, عدالة اجتماعيه

يوم 25 يناير بالليل قبل ما نتفرق بالعصيان وقنابل الغاز والمطاطي هتفنا

الشعب يريد اسقاط النظام

يوم 28 كان ضرب بس, مافيش اوي هتافات

واتقالنا نجحت الثورة, والجيش قال انتم ولادنا, واحنا جايين نحمي الثورة ثورة الشباب, ثورة ولادنا, وحنقعد 6 شهور بس.

طيب خلينا نشوف اللي حصل

1بالنسبة للعيش -الخبز

مستوى المعيشة بينحدر اكتر, طوابير العيش لسه موجودة, مليارات الفاسدين اللي هربوا برا مصر, مارجعتش, الفسدة اللي جوا السجن, لسه مصانعهم بإ`سمهم, وبتداول اسهمها في البورصه, والحد الادنى والاقصى للاجور لم يطبق, ومافيش اي امل في تطبيقه عن قريب"سمير رضوان اللي داير يشحت علينا, ويتكلم عن اد ايه الاقتصاد انضرب, بيقولك اخركم عندك 600 جنيه, وحين ميسرة كمان"

احيلك لمقال د.نادر الفرجاني مفندا وفاشخا كلام سمير رضوان

http://tinyurl.com/3l3cu6r

المقال لطيف جدا, وبيوفر علي اشرح اكتر جزئية الخبز

نيجي للجزئية التانيه

2-حريه

أ-محاكمات عسكرية

قبل الثورة, كنا شايفين ان محاكم امن الدولة لا شرعيه لها, هي ونيابة امن الدولة, لان دا قضاء استثنائي, ولا يجوز , وكان لما حد من الاخوان يتحول لقضاء عسكري, كنا بنقوم الدنيا ونقعدها, ونطعن في المحاكمات, ونقول ماينفعش, وهيصه يعني.

بعد الثوره, بقت المحاكمات العسكرية, شئ عادي جدا, لدرجة ان عدد المحكوم عليهم والمعروضين ع محاكم عسكرية , فاق عدد المدنيين اللي حصلهم كدا خلال التلاتين سنه حكم مبارك وزيادة

http://tahrirdiaries.wordpress.com/

ممكن تتابع المزيد عن المحاكمات العسكرية اللاانسانيه في الرابط السابق.

ب- الرقابة الاعلاميه

حرية ايه واللي ماسك ماسبيرو ضابط جيش, بيصدر اوامر بقطع برنامج ما ع الهواء فيتقطع, ودا شئ عادي جدا, ومايستلزمش منهم اي اعتذار؟

مثال

قطع برنامج الاستاذه بثينة كامل ع الهواء باوامر من سامي الشريف

http://www.youtube.com/watch?v=eJQgs4nmCz8

ودا رابط بيان باوامر المجلس العسكري للصحف والاعلام

http://twitpic.com/4jyjsa

جـ- الاتصالات

قبل الثورة, مكنش نسمع عن حق اي مسؤول في قطع الاتصالات, يعني الموضوع مكنش جهارا نهارا عيانا بيانا كدا دالوقت بقى في التالي

http://www.dostor.org/politics/egypt/11/may/12/41928

دالوقت بقى فعل قطع الاتصالات كلها في ايد الرئيس, ومجلس الوزراء, عاتشي كدا من حقهم.

دـ حرية التظاهر والتنظيم

قبل الثورة كانت المظاهرات الكبرى بيتم قمعها بشكل مباشر, ونادرا ماكنا بنتساب في مظاهرات اكثر من 5 الاف بني ادم, بس حصلت ثورة, والمفروض اننا يعني ناخد حريتنا, ونتظاهر, ونعترض, ونعتصم بمزاجنا, بس السيد شرف, والمجلس العسكري قرروا انهم يمنعوا دا تماما, بتفعيل وتغليظ قانون الطوارئ كما التالي

http://tinyurl.com/3l4abu3

طبعا غير شهداء وجرحى فض اعتصام 9 ابريل, بجانب جرحى الاعتصام التاني, ولاظوغلي, غيرهم.

وهي دي الحريه :-) اللي اخدناها بكل شهداءنا, وبكل تعبنا, وبكل اللي شوفناه قبل كدا

كرامة انسانية

معنديش حاجه اقولها في الجزئية دي, لاني اعتقد ان ماسبق كفى ووفى

عشان كل ما سبق, احنا نازلين تاني التحرير يوم الجمعة اللي جايه, 27 مايو, عشان نكمل ثورتنا, لان مافيش حاجه جديد حصلت, بل بالعكس احنا بنرجع للوراء اوي اوي زيادة عن اللزوم

لا لمجلس العسكر

لا للمحاكمات العسكرية

لا للطائفية

لا للعنصرية

مصر بلد ابونا