امتي حنشيل الغشاوة

في 11 فبراير عندما تنحي مبارك في داهية الله يجحمة مطرح ما هو موجود ( لاني طبعا مش مقتنع انه موجود اصلا في المركز الطبي العالمي ) .. ، مبارك وقتها سلم السلطة للمجلس العسكري .. وبغض النظر وقتها عن كل الهيصة والفرحة اللي عمت جموع الشعب المصري مش عارف علي ايه .. بس تقريبا كان كل تركيزهم ان مبارك غار من وشهم وده انتصار كبير .. وان اكيد المجلس العسكري مش حيكون بالسوء نفسه

انا مكنتش مقتنع بالمجلس العسكري من اساسه لاني كنت مقتنع تماما ان مبارك مش حيسلم السلطة لحد يلف الحبل علي رقبته ورقبة النظام الفاسد بتاعة ..

يعني انا كنت مقتنع تماما ان كل المحاكمات اللي بتحصل وكل الهس والقلش بتاعهم ده صوري واي كلام .. بس كنت فاكر انهم حيطلعوا أذكي من كده وانهم حيقدموا بعض افراد النظام ككبش فداء علشان يطفوا النار واللهيب اللي مشتعلة في صدور الشعب .. لكن الحقيقة اكتشفت انهم اغبياء جدا لاكثر من سبب

طمعوا في ان ينجوا كل رموز النظام السابق وميقدموش ولا واحد كبش فداء .. والدليل اننا مسمعناش عن اي حد صدر ضده حكم نهائي في اي قضية مهما كانت صغيرة .. لدرجة ان الطمع وصل بيهم انهم حتي مش عايزين يضحوا بأي عسكري امن سواء داخلية او جيش .. يعني عايزين يحتفظوا بالنظام بالكامل

بدأوا في اللعب بنفس قواعد اللعبة اللي كان بيستخدمها نظام مبارك في استخدام الاعلام الرسمي لبث الفرقة والبلبلة بين الناس وده بدأ منذ اول يوم لتنحي مبارك علي فكرة للي ماكنش واخد باله .. ان الاعلام المصري علي استحياء كان بيظهر انه بيحاول يتطهر بس يعيني القيادات ضاغطة عليه ومسيطرة علي المسئولين فيه .. لكن في الحقيقة في نظري هو سيناريو مائع وطا مع الموجة ليجذب معه الكثير من الذين هاصوا علي حس الثورة واحتفلوا بحدوثها دون ان يشاركوا مشاركة فعليه بها فلم يشعروا فعلا بنفس احاسيس الثوار وما عانوه .. ثم بدأ يعلو بالتدريج للموجة القديمة في مهاجمة الثوار ولقي صدي واسع وسط من جذبهم معه  ليكونوا دفاعة ضد الثوار ولا يدخل هو في صراع مباشر

نفس سياسة التشويه المستمرة لكل رموز الثورة او من دعموها .. وده كان بدأه مبارك قبل الثورة مع كثير من الرموز وهما ماشين علي نفس الخطا بالظبط وبيوسعوا قاعدة التشوية  قبل الثورة كانت حركة كفاية وايمن نور والبرادعي وغيرهم .. وبعد الثورة زادوا عليها الكثير من الكتاب والمفكرين ، وكان الاعلام الرسمي وسيلتهم زي ما قلت لقلب الاوضاع

عدم محاسبة اي مسئول في الداخلية كبير او صغير بل علي العكس ترقية بعضهم ومكافئته بيأكد ان الناس دي ولائها للسلطة وعمر ما حيكون للشعب او البلد وبالتالي لا أمل في اصلاحهم .. عشان محدش يقولي هيكلة الداخلية والكلام الفارغ ده .. لازم الاصرار علي استبدال القيادات باخري جيده ودعمها لفرض سيطرتها علي ادارات الداخلية المختلفة ، مع الاصرار علي تقسمة الداخلية والحاق الكثير من اداراتها الي جهات اخري وبالتالي كسر التكتل الموجود داخل الوزارة وسهولة السيطرة علي الفساد فيه

كان نظام مبارك يمارس القمع والتعذيب في سجون امن الدولة والاقسام .. المجلس طور الفكرة تماما وبدأ في ممارسة القمع والتعذيب علنا في الشارع وامام جموع الناس .. وهو مقتنع ان ما يبثه من سموم لتشوية الثورة والثوار سيجعل كثير من الناس تتعاطف معه .. اذا فهي خطة مرتبة اركانها منذ البداية وسيناريو موضوع منذ البداية بيلاعبونا بيه ..

في البداية كانت الانتهاكات زي كشوفات العذرية وقتل المتظاهرين وسحلهم وخطفهم تتم في الظلام ولا يكون هناك دلائل كثيرة للعيان ليروها .. لكن طبعا الان بعد ما بدأت الانتخابات .. وأصبح واضح لبعض التيارات انها ستحصل علي مرادها الذي تمنته علي مدار سنين كثيرة وقت حكم مبارك .. فأي انتهاكات تحدث حتي ولو علي الملأ  حتضمن للمجلس عدم دخول تلك التيارات في الصراع فهي رأت بعينها انها اصبحت قاب قوسين أو أدني من تحقيق الحلم الذي تتمناه .. فا مش مشكلة بقي اللي بيحصل للمتظاهرين ومش مشكلة انتهاك الحرمات والاعراض ..

طبعا حدث ولا حرج علي كل شوية حكاية الطرف الثالث اللي بيحكوا عنه واللي نفسي مرة اشوفه او اشوف احد اعضائه .. اصل هو يا اما مفيش طرف ثالث وهما بيشتغلونا وده طبعا هو الاحتمال الصحيح او انه موجود وهم مش عارفين يمسكوه وده يبقي مصيبة اكبر انهم مش عارفين يمسكوا شوية افراد بيعيثوا فسادا في البلد .. امال حيعملوا ايه لو دخلوا حرب حقيقة وبجد

اللي مش قادر اصدقة ان في كثير جدا من الناس عندها انترنت وبتشوف الفيديوهات والصور والاحداث ازاي قادرة تكذب كل ده ومصدقة انه فبركه ...

واللي معندوش انترنت او مش بيعرف يدخل عليه .. ازاي لما بتسمع تصريحات المجلس العسكري مش قادر تميز التضارب في الكلام والتصريحات .. ازاي مش قادر تميز ان الكلام اللي بيتقال مش منطقي ومش راكب علي بعضه

ياسيدي لا تسمعلي ولا تسمع للمجلس .. انزل روح الميدان بص بنفسك علي الوضع اقف واتكلم واسمع من الناس .. شوف بعينك مين بيرمي علي مين ومين بيضرب علي مين .. بص مين فوق المباني دول بلطجية ولا عساكر جيش وزيهم الرسمي باين وواضح ..

روح المستشفي الميداني .. بص علي المصابين اللي هناك شوف بنفسك انه رصاص حي مش فوتوشوب .. وان اللي بيتقالك في التليفزيون كذب

الناس اللي بتتصل بالتليفون علي القنوات تشتم في الثوار وتقولك دول مش ثوار 25 .. وانت ايش عارفك ثوار 25 شكلهم ازاي .. حد قالك ان في بادج علي هدومهم .. في علامة مميزة في وشهم

الناس اللي بتقولك ثوار 25 يناير كانوا ناس متعلمة ونظيفة وفاهمة دول عالم صيع .. جبت منين الكلام ده .. ايه دليلك عليه .. ايه التفرقة العنصرية اللي انت بتميز بيها الناس دي .. يعني المتعلمين ولاد الناس النظاف اللي بيستحموا بصابون بريحة ليهم الحق يعيشوا في البلد والباقي ولاد وسخة ..

طب هما مين اللي خلاهم ولاد وسخة .. مش النظام السابق .. اللي لا علمهم ولا عالجهم ولا اكلهم ولا شربهم .. وقت ما انت في عز البرد نايم تحت لحافك متدفي .. هما نايمين مرصرصين من البرد .. وقت ما انت كنت بتاكل 3 وجبات في اليوم هما ممكن يقعدوا كذا يوم من غير اكل اساسا ..

وبعدين مين قال ان الناس النظيفة اللي بتقول عليهم لما نزلت الميدان  وعملت ثورة فضلت نظيفة .. علي اساس ان فيه ادشاش عمومية في الميدان بيستحمي الثائر فيها وهو مروح ويتكلين عشان يبقي خرج زي ما دخل ..

كلام هايف ومرسل ولا ليه اي قيمة ولا يدل الا علي هيافة المتصل .. وانه مغيب عن الوعي .. وان اولي بيه بدل ما عمال يقول اي كلام ينزل يبص بنفسه ويشوف ..

لسه في حد مقتنع ان المجلس العسكري هو ملاذ الامة .. لسه في حد مقتنع ان المجلس العسكري .. هو أمل البلاد وانه خط الدفاع اللي حيدافع عنا

حيدافع عنك ازاي يا محترم اذا كان هو نفسه بينهش في لحمك وبينتهك عرضك ومتقدرش تآمنه علي بيتك ولا مالك ولا شرفك

خلص الكلام ..