دم بدم ورصاص برصاص ..
ايه !! ..
مين مستغرب من ان ده لازم يبقي الحال في البلد ..
مين مستغرب احنا ليه وصلنا لهذه المرحلة من بعد سنتين من الثورة ولسة بيسقط
مننا شهداء .. ولسة النظام برده بيعتبر بعضهم بلطجية ومجرمين ..
ياللي مؤمن بالسلمية .. وتقول ثورتنا سلمية .. أيوة بدأناها سلمية .. بس
ممكن تقولي كده اللي اتضرب بالنار او اتصاب .. او اتسحل .. أو اتقبض عليه واتعذب
.. ممكن يفضل مؤمن بسلمية بتاعتك دي ازاي !!
ياللي مؤمن بالسلمية .. هو انت مشوفتش الخيام والاعتصامات السلمية اللي
الامن المركزي بيهاجمها في الميدان وبيحرقها ويقبض علي اللي فيها !!
ياللي مؤمن بالسلمية .. مشوفتش المسيرات السلمية اللي بتتهاجم .. والبنات
اللي بيتحرش بيهم في الميادين !!
انت بتضحك علي نفسك ولا بتضحك علي مين .. !!
هو احنا اللي بنهاجم ونبلطج .. ولا احنا بننزل نطالب بحقوقنا المشروعة في
اننا نعيش عيشة كويسة .. علشان عندنا رئيس وحكومة مالهومش أي لازمة ومش عارفين
ياخدوا قرارات تصلح البلد أو توقف نزيف الدمار اللي بيحصل في مؤسسات الدولة
المختلفة والبنية التحتية بتاعتها
ولا انت ناوي تحمل المتظاهرين حوادث القطارات وانهيار العمارات وغرق
المراكب كمان
اوعي تكون ناوي تحمل المتظاهرين انهم السبب في زيادة اسعار البنزين
والكهرباء والمياه .. وتحديد عدد اغرفة العيش
ومتقوليش اصل المتظاهرين بينزل وسطيهم بلطجية أو مأجورين .. ماشي ده أمر
وارد مقدرش انكر طبعا .. بس ده مش حتقدر تمنعه .. ومينفعش يبقي البديل بتاعك انك
متنزلش تتظاهر أو تطالب بحقوقك من النظام ..
ولو انت مش عايز تنزل براحتك .. بس متهاجمش الناس اللي بتنزل وتقلل من
عزيمتهم أو مجهودهم .. علشان الناس اللي بتنزل دي بتضرب وبتتسحل وبتموت علشان قضية
البلد بحالها مش قضية فرد أو اثنين ..
اوعي تقولي ادوله فرصة .. علشان هو أخد فرص كثير قوي .. ومعرفش يستغلها ..
ومتمسك بحكومة فاشلة عمالة تدمر في الاقتصاد .. ومش عايز يهيكل الداخلية وسايبها
تمارس نفس ألوان السحل والتعذيب بنفس الهمجية اللي كانت عليها وقت مبارك ويمكن
اكثر كمان
متقوليش حوادث القطارات والمركب والعمارات دي من تركة مبارك .. أبوة مبارك
كان فاسد وبوظ الدنيا .. بس الاخوان ورثوا تركة فاسدة وهما عارفين انها فاسدة ..
ومع ذلك مأخدوش اي قرارات اصلاحية تعمل علي تطهير المؤسسات علشان يحاولوا يوقفوا
نزيف الحوادث دي .. علي العكس كان تركيزهم كله علي أخونة المؤسسات دون النظر
للخبرة المهنية .. وأهملوا أو تغاضوا عن وضع خطة اقتصادية وهيكلة حقيقية فكانت
النتيجة استمرار نزيف الحوادث ويمكن اكثر من أيام مبارك كمان
متقوليش رئيس منتخب والكلام بتاعهم ده .. لاني حتي لو فرضت معاك انه رئيس
منتخب .. وان الصناديق محصلش فيها تزوير – رغم اني متأكد من التزوير – الا اني
حمشي معاك للاخر .. وحقولك ان لو كلامك صح يبقي لان في ناس انتخبته مش حبا فيها
لكن في انها مش عايزة شفيق يكسب .. صحيح ده كان غلط لانهم لو كانوا انضموا
للمقاطعين وضغطوا لسقوط الانتخابات تحت حكم العسكر مكناش وصلنا للوضع ده .. بس ما
علينا اللي حصل حصل ومش حنقعد نعيط علي اللي فات ..
طب لو كلامك صح وهو رئيس منتخب زي ما بتقول .. مش المفروض يبقي رئيس منتخب
لكل المصريين .. ولا هو رئيس منتخب لاهله وعشيرته وبس ..
لو كلامك صح وهو رئيس منتخب زي ما بتقول .. مش المفروض يشكل حكومة متوازنة
مبنية قوة الخبرة والمهارة مش علي مبنية علي قوة العلاقة بمكتب الارشاد .. علشان
تاخد قرارات تصلح البلد وترفع شوية من علي المواطن اللي مش لاقي ياكل أو يعيش !!
لو كلامك صح وهو رئيس منتخب زي ما بتقول .. وبتحصل في حكمه كل الكوراث دي
.. وبيقع في عهده شهداء .. وبيتسحل المواطنين وبيمتوا في الشوارع من الداخلية اللي
مش عايز يهيكلها وعمال بيأخونها علشان تقف معاه مش ضده .. مش المفروض ان ده ميحصلش
او منشوفهوش بالشكل ده
لو كلامك صح وهو رئيس منتخب زي ما بتقول .. وبيحصل في حكمه كل اللي انا
قلته يبقي رئيس فقد شرعيته وسقط في نظر شعبه .. وشعبه مش حيخليه علي رأس السلطة
تاني
مستني ايه تاني علشان تنزل تسقط نظام .. بعد ما رفع سعر البنزين والمياه والكهرباء
.. وحددلك تاكل كام رغيف عيش
مستني ايه علشان تسقط نظام .. وانت شايف كل يوم في كوارث بتحصل وحوادث
بتحصل ولا حياة لمن تنادي .. وأسهل عليهم انهم يفضلوا يحملوا النظام اللي فات بسبب
الكارثة وخلاص
مستني ايه علشان تسقط نظام .. وانت شايف محاولة واضحة للسيطرة علي كل انظمة
الدولة ومؤسساتها .. وياريت الاخونة دي مفيدة .. أديك شايف المحافظ الاخواني مش
قادر يسيطر علي محافظتة والفساد اللي فيها .. والوزير الاخواني مبوظ الوزارة اللي
ماسكها أكثر ما هي بايظة وعمال يدمر فيها ..
مستني ايه علشان تسقط نظام .. وانت شايف القضايا كلها عمالة تطلع فشنك
واتباع نظام مبارك عمالين يخرجوا واحد ورا التاني في الوقت اللي القضايا بتاعة قتل
المتظاهرين عمالة تطلع الظباط .. أو بتلبس القضايا لناس ثانيا ككبش فداء ليهم
مستني ايه علشان تسقط نظام .. وانت شايف محاولات التدخل الواضحة من دول
عربية زي قطر في الامور الداخلية علشان عايزين ياخدوا استثمارات يضربوا بيها منطقة
الخليج وتحديدا الامارات
مستني ايه علشان تسقط نظام .. وانت شايف أخوك او أختك المصرية في دول ثانية
بيتسحلوا ويتبهدلوا وحكومتك مش بتعمل أي حاجة علشان تخرجهم .. ورئيسك متجاهل تماما
الموضوع رغم انه ساعات بيروح يزور البلاد دي .. لكن بيجري يبعت مندوبين رسميين لما
بلد منهم تسمك او تقبض علي حد من جماعته واهلة وعشيرته .. يعني المفروض انك تنتمي
لقطيع الخرفان لو عايز تعيش
بس انا مش ناوي أبقي خروف وألغي عقلي .. شوف انت عايز تبقي ايه
حتسألني وتقولي طب وبعدين بعد ما نسقط الاخوان حنعمل ايه !!
حرد عليك بحاجتين .. أول حاجة هو احنا لما خرجنا نسقط نظام مبارك كان
عارفين ايه بعدين .. !!
احنا خرجنا للشوارع نهتف ضد الظلم واستمرينا في الشوارع وصمدنا لغاية ما
اسقطنا النظام .. ومتنساش كان في برده دم وبلطجة علشان شكلك بتنسي وتقولي سلمية ..
وكان في ساعات ناس بتدخل وسطينا من باعة جائلين أو بلطجية .. وكان برده ساعات
بتحصل بعض الامور اللي بتخرج عن السيطرة .. عادي ده امر وارد .. بس برده متنساس
بلطجة نظام مبارك والداخلية .. واحداث موقعة الجمل .. ومتنساس برده وقت العسكر
وأحداث مجلس الوزراء ومحمد محمود وغيرها .. ومتنساش برده أحداث بورسعيد وغيرها
ثانيا أنا عارف ان النخبة اللي موجودة كلها متنيلة بستين نيلة .. وبتدور
علي مصلحتها وبس علشان ينوبها حتي من التورتة وخلاص .. بس حتعمل ايه .. هل ده
معناه نستحمل العذاب والذل والموت والبهدلة علشان عندنا نخبة وسخة .. خلاص يتحط
عليهم هما مش أحسن من غيرهم
عندك شخصيات كثيرة في مجالات مختلفة سياسية واقتصادية وقانونية تقدر تشكل
منهم مجلس انقاذ يدير البلد لحين عمل انتخابات وتظبيط الامور
مجلس انقاذ يدير البلد ويعمل علي هيكلة الداخلية كأهم قراراته .. علشان
يضمن خلق نظام أمني مستقر في البلد ..
مجلس انقاذ يدير البلد ويعمل علي أخذ قرارات اقتصادية بخبرة الاقتصاديين
الموجودين فيه .. دورها انها تصلح الوضع الحالي وتوقف نزيف الدمار الاقتصادي اللي
حاصل
من الاخر مجلس انقاذ يدير البلد ويعمل علي سن قوانين واخذ قرارات فشلت
حكومة الاخوان في انها تاخدها
لو مقتنعتش بأي كلمة من اللي اتقالوا دول .. خلاص براحتك .. بس أنا مقتنع
ومستمر ومكمل عشن اعيش حر أو أموت حر .. لكن مش ناوي أعيش وأموت ذليل لأي نظام
لو مقتنعتش بأي كلمة من اللي اتقالوا دول .. خلاص براحتك .. بس علي الاقل
متهاجمش الناس اللي نزلت واللي لسة بتنزل علشان هي مقتنعة بحقها وحق عيالها .. ومش
ناوية ترجع لغاية ما تحس انها عملت تغيير
يَا أَيُّهَا الَّذِينَ آمَنُواْ كُتِبَ عَلَيْكُمُ
الْقِصَاصُ فِي الْقَتْلَى الْحُرُّ بِالْحُرِّ وَالْعَبْدُ بِالْعَبْدِ وَالأُنثَى
بِالأُنثَى فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْمَعْرُوفِ وَأَدَاء
إِلَيْهِ بِإِحْسَانٍ ذَلِكَ تَخْفِيفٌ مِّن رَّبِّكُمْ وَرَحْمَةٌ فَمَنِ اعْتَدَى
بَعْدَ ذَلِكَ فَلَهُ عَذَابٌ أَلِيمٌ
سورة البقرة – 178
وَكَتَبْنَا عَلَيْهِمْ
فِيهَا أَنَّ النَّفْسَ بِالنَّفْسِ وَالْعَيْنَ بِالْعَيْنِ وَالأَنفَ بِالأَنفِ وَالأُذُنَ
بِالأُذُنِ وَالسِّنَّ بِالسِّنِّ وَالْجُرُوحَ قِصَاصٌ فَمَن تَصَدَّقَ بِهِ فَهُوَ
كَفَّارَةٌ لَّهُ وَمَن لَّمْ يَحْكُم بِمَا أنزَلَ اللّهُ فَأُوْلَـئِكَ هُمُ الظَّالِمُونَ
سورة المائدة – 45
وَلَكُمْ فِي الْقِصَاصِ
حَيَاةٌ يَاْ أُولِيْ الأَلْبَابِ لَعَلَّكُمْ تَتَّقُونَ
سورة البقرة – 179
