ازاي نتفاعل مع الناس

ازاي نتفاعل مع الناس ... ازاي نتعامل مع الناس ... ازاي نقنع الناس بأهمية الاستمرار في الثورة .. واهمية المطالبة بضرورة تسليم السلطة

في حاجات بسيطة ممكن تعملها ومش حتكلفك اي حاجة ومش حتاخد من وقتك اي حاجة .. لكن تأثيرها صدقني حيكون قوي جدا وفعال

الاعلام الرسمي .. بيستخدم الزن علي ودان الناس لغاية ما كرههم في الثورة واللي عملها .. احنا برده بالاقتراحات دي حنستخدم نفس الاسلوب .. الزن الغير مباشر .. لازم يفضلوا شايفين وفاكرين علي طول الحاجات اللي في الاقتراحات دي .. علشان نعمل التأثير المطلوب

دي بعض الاقتراحات اللي ممكن تنفذ بعضها او كلها لو قدرت

1.    لو معاك عربية .. ممكن تطبع رسالة من الرسائل اللي في اللينك ده من مبادرة سلاسل .. الزقها علي زجاج عربيتك .. طول ما انت سايق الناس حتشوفها وتقراها .. عايزين تبقي قدام عينيهم في كل الشوارع  .. اختار الرسالة اللي بتعبر فعلا عن حاجة جواك انت مقتنع بيها .. عشان لو حد وقفك يسألك عنها تعرف تكلمه عنها كويس

2.    أكيد كلنا عندنا كومبيوتر في البيت .. في الشغل .. حط صورة بوستر عن العودة للميدان يوم 25 يناير خليها صورة بروفايلك علي الفيسبوك .. خليها صورة الخلفية علي الديسك توب .. خلي كل اللي بيستخدم جهازك او قاعد جنبك يبقي شايفها ..عشان تبقي دايما قدام عينيه

3.    نزل مقطع من اغاني الثورة اعملة رنة موبايلك .. زي اغنية ضحكة المساجين .. او أي اغنية انت حببها وبتعبر فعلا عن الثورة .. خليها رنة موبايلك .. علشان تتسمع في كل مرة موبايلك يرن

4.    افتح مناقشات مع الاهل والاصدقاء والجيران وزملاء الشغل كل ما تتاح الفرصة عن ضرورة واهمية تسليم السلطة .. مفهومها .. اسبابها .. خلي كلامك منطقي .. بلاش تقول للناس العسكر والجيش .. والكلام ده .. كلمهم عن التعب في الانتخابات اللي تعبوه واللي لازم يحسوا بنتيجته .. كلمهم عن مشاكلهم وعن الزحام والطوابير وازمة الغلاء والاسعار .. كلمهم عن كل حاجة بتوجعهم .. اوعي تجيب سيرة العسكر .. خلي كلامك يوجعهم .. خلي نتيجة كلامك في النهاية تخليهم هم ينطقوا بسقوط العسكر وضرورة تسليم السلطة

5.    نزل فيديوهات انتهاكات العسكر علي موبايلك شغلها طول ما انت في المواصلات او في اي مكان .. خلي صوتها يبقي واصل للناس .. الناس فضولية وتبقي عايزة تعرف انت بتعمل ايه .. استغل فضولهم .. اوعي تتكلم في البداية .. خلي الناس تتفرج .. خلي الناس .. هي اللي تنطق بعبارات التأثر باللي بيشوفوه .. خليهم هما يتكلموا .. واكد علي كلامهم .. علشان يتوجعوا اكثر .. ويزيد نقمهم علي العسكر واهمية وضرورة تسليم السلطة

6.    لو انت من هواة قعدة القهاوي .. اتكلم مع اصحابك علي القهوة بصوت عالي في مواضيع تسليم السلطة .. وليه الناس نازلة يوم 25 يناير .. خلي صوت العالي .. ومناقشتك الموضوعية ... تجبر الفضوليين حواليك يشتركوا في الحوار .. اسمع التعليقات .. للنهاية ومتردش مرة واحدة .. متقعدش تكرر كلامك كانك حافظ .. ابتدي وجه الحوار زي ما قلنا للي بيوجعهم وركز عليه بشدة .. عيد وزيد فيه .. اضغط عليهم اكثر .. خلي كلمة الحق تطلع من بقهم الاول

دايما خلي مواضيعك .. تسليم السلطة .. اختيارات الناس في الانتخابات ورغباتهم اللي لازم تتنفذ .. تسليم السلطة وشرعية البرلمان من هيبة الدولة .. مشاكل الناس وهمومها