بما ان حظك الاسود انك طلعت ابن البلد دي .. وان حظك العاثر انك اتولد واترعرعت في البلد دي وولادك برده حيطلع حظهم من حظك ..فهل ممكن تسمحلي اكلمك عن بعض حقوقك اللي اكيد انت عارفها بس مش عارف ليه مطنش عليها ومش عايز تطالب بيها
يعني ايه تحس ان من حقك علي الدولة انك تعيش حياه افضل ..
يعني تحس انك لما تنزل تشتري رغيف عيش تلاقيه رغيف آدمي مش لمجرد ان قدرتك المادية انك تدفع في رغيف أقل انك تلاقيه مليان مسامير وزلط وخشب وحاجات ثانية غريبة ..
يعني انك لما تقرر تدخل عيالك مدارس يبقي بيتعلموا بجد ويبقي فقط الفرق بين ابنك وبين ابن الاغنياء هو الخدمات الترفيهية و التعليمية الاضافية التي قد يحصل هو عليها لقدرته علي الدفع ..مش يبقي الفرق في اساس العملية التعليمية نفسها ان ابنه يتعلم وابنك ميتعلمش
يعني انك تركب اتوبيس او مترو تلاقي كرسي تقعد عليه مقابل التذكرة اللي دفعتها .. ويكون كرسي نظيف مش مخزوق مسامير ومهبب بالشحم والاتوبيس مكيف في الصيف وفيه زجاج يحميك من برد الشتا ..
يعني لما تروح مستشفي علشان تتعالج .. تلاقي دكتور بجد ..وعلاج بجد ..مش علشان مش معاك فلوس انك يتكتب لك اي تشخيص ويدوك أي دواء وبدل ماتلاقي نفسك بتتعالج تلاقي نفسك زدت امراض
يعني لما تقرر انك تسكن ..تلاقي مسكن آدمي فيه مياه وكهرباء وصرف صحي .. ومواصلات نظيفه لغاية شغلك ومدارس قريبة لعيالك ..مش يرموك في الصحراء في المدن الجديدة معدوم الخدمات والاسم اتحسبت عليك شقة
يعني لما تقرر تسكن .. تسكن في شقة بجد .مش تلاقي نفسك عايش في عشة فراخ ضيقة ومش مكفياك انت وعيالك والحيطان بترشح عليك والاساس بايش من المياه والصرف الصحي والكهرباء بتقطع وحلتك كرب وتصعب علي الكافر
علشان تحس انك عايش حياه افضل لازم تحس انك بتدفع بس مقابل الخدمة اللي بتاخدها .. لازم ميبقاش في نظام فرض اتاوات وبلطجة تحت مسميات مختلفة
لازم تحس بانتمائك للبلد علشان تديها زي ما اخدت منك .. مش مطلوب ابدا انك تحس ان حظك الاسود انك طلعت ابن البلد دي
No comments:
Post a Comment