ورجعنا نعيده تاني !!

رجعنا مرة اخري للصراع مابين ان نقبل مجلس رئاسي مدني .. ام نستكمل الانتخابات ..

رجعنا مرة أخري لمهاجمة بعضنا البعض .. واتهام كل فصيل للاخر .. ومش عايزين نشوف الشارع عايز ايه !!

الفصيل الوحيد حتي الان الذي يعارض وبكل صراحة وبقوة هم الاخوان تحت نبرة ان المجلس الرئاسي غير دستوري .. !!

طيب حد يكلمني عن ايه دستوري .. هل حزب الحرية والعدالة المقام علي مرجعية دينية بالمخالفة للاعلان الدستوري .. يعتبر دستوري

هل ترشيحهم لمرشح رغم مخالفتهم للاعلان الدستوري .. يعتبر دستوري

هل وجود المجلس العسكري أساسا في السلطة يعتبر دستوري

هل ترشح احمد شفيق رغم ان ترشحه يعتبر مخالف لقانون العزل الذي يعارضون هم شخصيا تفعيله علي استحياء خوفا من ان يذهب شفيق ويصعد لهم حمدين .. هل هذا يعتبر دستوري

انا لم ولن اقبل ابدا ان يكون الحل هو استكمال الانتخابات بالصورة التي عليها ونحن نعلم مقدار الخراب والمهزلة الذي سيحل حال فوز اي من المرشحين بها .. وقصة بقة التبريرات اللي بنسمعها ان مرسي حيبقي ارحم من شفيق والكلام ده .. كله كلام فارغ .. اولا قبل اي حاجة .. الجيش عمره ماحيسمح ان مرسي يبقي بصلاحيات فعلية ويحط راس براس .. وده في حد ذاته صراع مش في مصلحتنا .. بالاضافة الي ان تواجد كل السلطات في الدولة في يد فصيل واحد عارفين كلنا من تجاربنا معه قبل الثورة وبعد الثورة من البرلمان وخلافة انه سيكون فاشل سياسيا بالاضافة الي انه اعادة لنظام الاحتكار اللي ياما عانينا منه في ظل نظام مبارك .. وبالتالي مش حينفع .. كما ان شفيق ايضا مش حينفع والاسباب كلها معروفه للجميع ومش محتاج افضل اعيد وازيد فيها  .. وفكره مجلس توافقي هي فكرة تم طرحها مسبقا في الميدان ولكن المطامع السياسية حالت دون تنفيذها .. والان مش عيب اننا نطرحها تاني عشان نعيد الاتزان الي الامور وتتوزع السلطات باسلوب يرضي كل الاطراف لو عايزين هدوء في البلد والخطأ كل الخطأ اننا نعاند ونكرر نفس الخطأ مرة أخري .. واوعي حد يقولي ان لو شفيق كسب المظاهرات حتملي البلد لكن لو مرسي كسب مش حيحصل .. في كلا الحالتين المظاهرات والاضطرابات ستملأ البلد ولن يستقر بنا الحال وحنروح  الي حرب اهلية وده اسوأ سيناريو ممكن ان نصل اليه .. وليه كل ده ..علشان مش عايزين مجلس متوزان يقيم الامور في البلاد .. لنضمن هدوء وسكون كل التيارات وكل الطوائف والشارع المصري لننظر الي المستقبل والغد .. وصل الكلام .. ولا نعيد كمان :)