كنت قد كتبت منذ يومين تدوينة عن الصبر الذي نفذ لدي الثوار وشعب مصر ضد الظلم والفساد البين الواضح من المجلس العسكري في التضليل والتدليس للحقائق ، وفي اليوم التالي الموافق 28 يونيو حدثت موقعة الجمل واللي مش عارف اقول عليها الثانية ولا الثالثة ولا رقمها كام .. ماعلينا مش مشكلة الرقم المهم اللي حصل والنتيجة .
تابعت كل اللي اتقال في التليفزيون والتويتر والفيسبوك ونزلت التحرير بنفسي وتقصيت ورايت وسمعت واحسست بالحدث لاعود واحاول ان اضع تصوري البسيط عن الاحداث
اللي يقولك اصل دي بلطجة وفي ناس بلطجية اتهجموا علي احتفالية لتكريم اهالي الشهداء في مسرح البالون .. ده يبقي واهم وبيحاول انه يضلل الناس ويبعدهم عن الحقيقة
مسرح البالون ايان كان اللي حصل عنده انا مش شايف اي علاقة منطقية بينه وبين الاعتداء علي الناس في ميدان التحرير والضرب بكل وحشية وضراوه ليسقط اكثر من الف مصاب واستخدام القنابل المسيلة للدموع والرصاص المطاطي بافراط زائد عن الحد .
الظريف في الموضوع واللي ياكد ان ده امر مفتعل من الداخلية علشان يستفزوا مشاعر الناس في الميدان ويخلوهم يهاجموهم فيردوا عليهم بالضرب هو استخدامهم لاسلوب جديد الا وهو السباب والشتائم باقذر واشنع الالفاظ عبر مكبرات الصوت وهو ما سجلته العديد من كاميرات الفيديو للناشطين وانتشرت علي الانترنت لتعلن فضيحة الداخلية بعد الثورة وكيفية تعاملها المحترم مع الناس .
من الواضح جدا ان الداخلية مازالت تري ان الشعب المصري حثالة وانهم اسيادهم ، الامن المركزي مازال متذكرا للعلقة اللي اخدها يوم 28 يناير وبيطبق سياسة التار ولا العار ... وعايز ياخد بتاره باي طريقة من الثوار
ويساعدهم في ذلك القضاء بقراراته المستفزة في التاجيل المستمر لقضايا قتل الثوار ،بالاضافة الي ملاحقة الناشطين وتحويلهم دون وجه حق الي محاكمات عسكرية
الاستفزاز المستمر من وسائل الاعلام الرسمية في تغطية حالة الموكوس في شرم الشيخ وانه تعبان يا ولداه وحالته حالة وبيستعينوا بالفريق الطبي بتاعه من بره ، وانه عنده اكتئاب وزعلان من الشعب المصري ومتضايق .
تسريب معلومات عن جمال وعلاء وانهم بيرسلوا خطابات او مراسلات للسلطان قابوس بيشكوا له الاوضاع ويطلبون المساعدة ( المفروض انهم في السجن وبالتالي كل مراسلاتهم تخضع لرقابة مصلحة السجون والداخلية .. يبقي اللي سرب المعلومة حد منهم )
بتوع احنا اسفين يا ريس وابناء مبارك وبتوع مصطفي محمود اللي المجلس علي طول طالقهم في الشارع وسايبهم بحجة الديموقراطية وانه زي ما سايبنا هو سايبهم ... مع ان الثوار في مظاهرات واعتصاماتهم مش بيعملوا اي مشاكل او قلق زي الناس دي .
التشوية المستمر للثوار والناشطين علشان يفقدوا المصداقية والتاييد من الشارع المصري ، فلما تحين اللحظة اللي هما بيخططوا ليها كويس قوي قوي ويحطوا علي الثوار والنشاطين يبقي الشارع ميعترضشي عن اللي بيحصل بل العكس يؤيد ويبارك
لو قعدت اسرد ساحتاج الي مجلدات مش كتب تحكي عن كل الاستفزاز والضغوط اللي بتمارس علي الشعب علشان يخرج عن شعوره فيكون للهم الحق في الرد بكل قسوة علشان يعلمونا الادب وان الله حق .
الفساد ليس في الجيش ولا في الداخلية .... الفساد في العقول والنفوس والذمم للمسئولين عن الجهات دي ، وهما اللي بيبثوا سموم فكرهم الفاسد الي القيادات الاصغر وربما ايضا يمارسون عليهم الضغوط والترهيب من اجل ان يتعاملوا مع الشارع بتلك الطريقة ... فانتصار الثورة معناه القضاء علي نفوذهم وسيطرتهم ... انتصار الثورة معنها انهم حيتركنوا علي الرف ومش حيبقي ليهم لازمة
انتصار الثورة يولد لديهم الاعتقاد بانه سيتم تهميشهم وبالتالي سيكون للقمة سائغة لكل من تسول له نفسه للنهش في اعراضهم والتفتيش في خباياهم وفسادهم ....
والحقيقة ... اه .. هو ده اللي حيحصل فعلا .. اصل ده امر طبيعي لابد من حدوثه .. دي ثورة .. يعني ثورة علي كل ما هو فاسد ومنحل .... ثورة لاعادة الاوضاع الي وضعها السليم وتقويم ما يمكن تقويمه وبتر ما يلزم بتره
بس خلاص .... J
No comments:
Post a Comment