في الحقيقة اتابع بشدة كافة تطورات قضايا محاكمة المتورطين في قتل الشهداء
اتابع التعليقات المستمرة علي الفيسبوك والتويتر ،، اشاهد الحوارات التلفزيونية علي الفضائيات ،، اقرأ كافة المقالات تقريبا ...
الكل معترض ويسب ويلعن للمجلس العسكري والنائب العام الفاسد علي التواطئ الواضح والصريح في التلكع وتاجيل المحاكمات واحدة تلو الاخري واستخدام الدفاع لكل الاساليب والثغرات القانونية المتاحة والغير متاحة من اجل مد اجل المحاكمات الي اجل غير مسمي .
والحقيقة عندما اجلس لافكر في نهاية كل هذا .. اندهش ، ماذا يريد المجلس العسكري وما الغرض الدنيئ الذي يسعي اليه من وراء كل هذه المماطلة ... هل لا سمح الله ينوي الافراج عنهم ، هل ينوي ان يجد ثغرة قانونية ليكون فقط احد المتهمين هو كبش فداء في القضية برمتها ، هل يعتقد ان سياسة النفس الطويل قد تجعل الناس تمل وتنسي ما حدث ، هل يعتقد ان سياسة النفس الطويل قد تجعل الناس تنقلب علي بعضها بين مؤيد ومعارض تحت حجة الاستقرار والعجلة والمركب وكافة وسائل النقل المختلفة .
كل الشواهد والقراءات وتتابع الاحداث تؤكد ان المجلس يسعي بكل قوة الي افشال المحاكمات ، وساعتبره أعمي كل من لا يري ذلك . كأن من بالحبس يمسكون ذله علي المجلس العسكري ويساومنه بها .
طيب ... نسيبنا بقة من شوية النحوي ده .. علشان نتكلم علي راحتنا ......
من الاخر كده المجلس العسكري عرف يلعبها صح معانا وكان بيسمع لنبض الشارع ، وعرف ان شعبنا الحلو الامور .. شعب عاطفي .. ويضحك عليه بكلمتين
الاول طلع بيان حلو صغير وفي وسط البيان تحيه عظيمة لارواح شهدائنا ... واستخدم كلمة شهدائنا بدل كلمة شهدائكم اللي استخدمها الموكوس في خطابه .
كل شوية بيانات عسكرية تؤكد علي انا منكم وانتوا مني ومش حنعض في بعض وخلينا حبايب وسيبكوا من الناس الوحشين اللي طلعوا ميتين ابوكم 30 سنة وانا كنت واقف وبتفرج عليكوا ومعملتش حاجة
وكل شوية رصيدنا يسمح لديكم .. رصيدنا يسمح لديكم .. ويرزعنا كل رزعة والتانية ويرجع برده رصيدنا يسمح لديكم ...
واحنا علشان شعب عاطفي وحسيس وبيتكسف وعنده حياء ووشة بيحمر وبيخاف يحرج اللي قدامه .. بقينا بناخد كل قفا ونضحك ونقول معلش المسامح كريم .. ده جيشنا وحامي حمانا والخط الاحمر بتاعنا ومالناش حد تاني من بعده لو هجرنا ..
بس الجيش نسي جملة أم كلثوم الشهيرة .. للصبر حدود ... للصبر حدود
يا مجلسنا ياللي وليناك امورنا ظنا منا انك حامينا ومدلعنا .. وحتجيبلنا حقنا من الاشرار اللي كنت سايبهم 30 سنة وبتتفرج عليهم وهما بيحطوا علينا ...
يا مجلسنا رصيدك نفذ .. وانتهت فترة الصلاحية كمان ... يعني من الاخر لازم الشعب يشتري خط جديد ..
في شركات الموبايل بيقولك لو لسه محدش خد الخط ممكن تشتريه تاني ... طب يعني قدامك فرصة عمرك يا تركز كده وتعرف تشتري الخط صح .. يا اما نشتريه احنا بقي .
احنا مش طالبين منك غير شوية حاجات صغيورة كده .... عيش .. حرية .... عدالة اجتماعية ....
شفت سهلة خالص عايزين ناكل عيش ... ونعيش بحرية وكرامة ونحس اننا بني آدمين .... ونحس ان احنا بناخد حقنا في البلد دي ومحدش يحط علينا
صعبة دي !!!!
No comments:
Post a Comment