الاصابع الخفية

عندما كتب الشاعر جمال بخيت قصيدته .. دين أبوهم اسمه ايه .. كانت معبرة بكل حرف فيها عن ماعاناه المصريين ومايعانوه كل يوم في ظل حكم هو أقرب للاحتلال .. وان كان في حقيقته ابشع من أي احتلال .. الاحتلال هو احتلال شعب لشعب ونهب ثرواته وكسر كبريائه .. ده في نظري تعريف الاحتلال ... لكن الابشع من الاحتلال ان المحتل يكون من نفس بلدك ..من نفس أرضك .. عاش وأتربي وسط اهلك وناسك ... الابشع من الاحتلال ان المحتل هو ابن بلدك اللي غدر باهله وناسه وحكم بالسيف والنار .. نهب ..سرق ..قتل ..دمر .. حرق

الابشع من الاحتلال بشر ..وميستحقوش يتوصفوا بانهم بشر .. خدوا علي عاتقهم مص دم البلد ..

عصابة استلمت الراية من عصابة .. ونشرت في وسطينا شياطنيها وزبانيتها علشان تلهينا عن اللي بتعمله فينا

خرج علينا عصام شرف امبارح بخطاب اقل ما يوصف به انه مزبلة .... انسان مش عارف هل مغيب عن الوعي وعن اللي بيدور حواليه .. ولا طالع يؤدي دوره في سيناريو حفظوه له يطلع يشتغلنا بيه ..

بيكلمنا عن الاصابع الخفية اللي عايزة تلعب في البلد ... ومش عايز يكلمنا عن الايادي اللي بتحرك الاصابع دي ..

بيكلمنا عن فتنه طائفية تريد ان تشتعل .. ومش بيكلمنا مين مصلحته ينشرها وفي الوقت ده بالذات ..

فين قانون دور العبادة الموحد ... فين محاسبة اللي حرق واللي قتل واللي سرق

فين قانون الغدر ومنع الحزب الوطني من الانتخابات

فين الستة اشهر اللي المجلس قال عليها واللي مش عارف احنا محتاجين كام ستة اشهر علشان يمشي من وشنا

فين الغاء الطوارئ اللي انتهت رسميا في 30 سبتمبر وهو بيمدها دون شرعية او الرجوع للشعب

فين حرية الاعلام والصحافة اللي تقييدها بيزيد يوم بعد يوم .. وماحدش عارف ايه النهاية ..

بتحاربوا اعلام خاص ليه ... وقنوات فضائية . أكيد الناس مش شايفة الشفافية والحق في قنواتك الحكومية

بتحاربوا تظاهرات سلمية ليه ...

معني ان الناس بتتظاهر معناه ان في ظلم ..في فساد .. في حقوق مسلوبة .. في مطالب متحققتش ..

التظاهر السلمي حق لكل مواطن زهق وقرف من تلال الفساد والقذارة اللي ريحتها فاحت في كل شارع وكل حي ..

التظاهر السلمي حق لكل مواطن شايف الكذب والخداع والتضليل في كل قنواتكم وبياناتكم وخطبكم الي مفيش فيها اي روح

التظاهر السلمي حق لكل مواطن شايف تدليس ووعود كذابة بارجاع الحقوق

وفي الاخر جايين تقولوا الاصابع الخفية ..

يا أخي انتوا دين أبوكوا ايه ..